هادم اللذات ومفرق الجماعات

افرض هاجمك الموت الان

,

هايكون مصيرك ومصير اهلك ايه

،

أإلى جنة أم نار

,

هل مراتى وبنتى هايتبهدلوا بعد موتى

,

عندى ثقة وحسن ظن بالله كبيرة اوى

,

اللهم توفنا وانت راض عنا

,

واجعل خير اعمالنا خواتيمها

,

وخير ايامنا يوم ان نلقاك

,

يا ارحم الراحمين

ويستعد الضيف العزيز للرحيل

نصف رمضان انتهى

لم نتمكن من استقبال هذا الضيف العزيز الاستقبال الملائم

لم نحتفى به كما يليق به

ما لا يدرك كله لا يترك كله

هل تستطيع تعويض ما مضى فيما بقى

اللهم تقبل منا قليل عملنا بكثير عفوك

وحسناتك يا ارحم الراحمين

درس مهم

ربنا يعلينا ويوطى نفوسنا

اول مرة افهم معناها بجد

مصر ام الدنيا

يوم الجمعة 12/9/2008 الموافق 12 رمضان 1429 هجرياً

وفى تمام الساعة العاشرة والنصف صباحاً بتوقيت الاسكندرية المحلى

وفى الطريق الى صلاة الجمعة وامام باب المسجد مباشرة

اذا بثلاثة نفر فى عمر الشباب

يجلسون على مدخل احد المحلات

جلسة مريبة

وعند الاقتراب منهم

اذا بهم يفعلون ما لا يتصوره احد

بيحششوا

يوم الجمعة

قبل الصلاة بساعة تقريبا

فى رمضان

مصر ام الدنيا

مصر المحروسة

اللهم ارفع مقتك وغضبك عنا

قفص حديد

بتبقى مش طايق نفسك لما بتكون عاوز تعمل حاجة ومش قادر تعملها تحت ضغط الظروف المحيطة بيك

بتحس انك مسجون فى زنزانة حديد مش قادر تخرج منها

ليس امامك الا الله

مفرج الهم والكرب ومجيب دعوة المضطرين

اللهم يا ودود يا ودود يا ودود

يا فعال لما يريد

يا من ملأ نوره اركان عرشه

اللهم يا مغيث اغثنا

اللهم ارزقنا ايمانا يملأ قلوبنا ولو كره الكافرون

بين يدى رمضان بالامس واليوم

لم يتبق الا ايام قليلة والشهر الفضيل يبدأ

من كام سنة لما كان يبدأ هلال شهر رجب كنا نبدأ نحضر نفسنا لرمضان ونزود الصيام شوية ونقعد نرتب هانروح نصلى التراويح فين ومع مين والتهجد وهانروح ازاى

السنة دى الصيام فى رجب وشعبان كان قليل اوى لاسباب مختلفة وابتديت افكر ( فقط تفكير ) هاروح اصلى فين التراويح والتهجد قبل رمضان باسبوع

صحيح الواحد مشاغله زادت كتير عن الاول وبقى عليه التزامات اكتر من الاول

بس الخوف ان يكون الرد على رب العزة تبارك وتعالى عند الحساب

شغلتنا اموالنا واهلونا

هاتكون حجتنا ايه

الشغل واكل العيش والعيال

الواحد مع الوقت محتاج ان طاعته لربنا تزيد مش تقل مهما كانت المشاغل اللى عنده لانه بدون توفيق من ربنا لن تكون له قائمة

اللهم ربى وخالقى ورازقى

لا حول ولا قوة لى الا بك

استغفرك ربى فكيف لاتغفر لى وانت بالغفران موصوف

ادعوك ربى وانت السميع البصير

اللهم يا مدبر الامر وكلت اليك امرى فلا تتركنى لنفسى طرفة عين

اللهم اجعل خير اعمالى خواتيمها وخير ايامى يوم القاك يا رب العالمين

اللهم اعنا على ذكرك وشكرك وحسن عبادتك

والحمد لله رب العالمين

الادب مع الله

ايه رايكم فى الصور دى ؟

طبعاً ماينفعش الوضع ده

ازاى واحدة تقف امام الخالق جل وعلا وهى باللبس ده وبالمنظر ده

ممكن اقولكم كلام مكرر بس واقعى جداً

لو واحدة من دول عندها ميعاد مهم مع شخصية ذات منصب مش هايكون ده لبسها ولا احترامها للشخصية المهمة دى

انا كنت فى كارفور يوم الخميس وقت صلاة العشاء وبعد الصلاة طلعت استنى الناس اللى كانت معايا امام المصلى

شوفت مناظر ولبس مش ممكن يكون ده لبس او هيئة واحدة تقبل تقف بها امام الله عز وجل

شئ مش مقبول بالمرة

والغريبة ان مع كل واحدة من اللى داخلين يصلوا بالمنظر ده واحدة كبيرة ولابسة لبس محترم

الواحدة اللى لابسة محترم دى مفكرتش تنصح اللى معاها ان كدة لايصح

ولا هى مش عارفة هى كمان !!!!!!!!!!

اوضاع الناس فى مصر وكل مكان اصبحت غريبة وعجيبة

بقينا نسمع ونشوف حاجات بتتكرر قدامنا كل شوية واصبحت عادية جدا حتى معايا انا شخصياً

مع اننا فى ايام الدراسة علمونا ان الحاجات دى غلط وماينفعش تتعمل ولو شوفنا حد عملها قدامنا تبقى كارثة محققة حصلت قدامنا

اللهم ربنا يا خالق يا بارئ يا مصور

يا مقلب القلوب الابصار ثبت قلوبنا على الايمان

اللهم ربنا ارنا الحق حقا وارزقنا اتباعه

وارنا الباطل باطلا وارزقنا اجتنابه

لخبطة

انا بقالى فترة مش قصيرة حاسس انى فى دوامة ومش عارف اخرج منها

مش عارف الاحقها منين ولا منين

والاحساس ده عند اغلب الشعب المصرى مش عندى لوحدى

فى الناس دايما تقول احنا مربوطين فى ساقية !!!!!!!!!!!!

احساس منتشر بشكل كبير بين الناس حاسين ان عينهم مربوطة ومش شايفين حاجة وماشين وخلاص وصلوا فين ومشيوا قد ايه مش عارفين بس لازم يمشوا لانهم لو وقفوا هايخسروا كتير اكيد الاحساس ده مش كويس

احساس غبى

بس ده فعلا احساس ناس كتير جدا كل يوم بنقابلهم

واحلى حاجة واغرب حاجة تفسير بعض الناس للموضوع ده

يقولك اصل دى سياسة الحكومة بيلهوا الناس بأكل عيشها علشان يعملوا اللى هما عاوزينه من غير ما حد يقف لهم

قال يعنى حد كان ليه رأى أساسا

انا عندى احساس انى كنت الاول فى حال احسن كتير من حالى دلوقتى

كل ما السن بيزيد بتزيد معاه المشاكل والهموم - اللهم لا اعتراض -

ايه ممكن يكون العلاج للوضع ده ؟؟؟؟؟؟؟؟؟؟

من هو ؟

هل فكرت يوما من هو احب انسان اليك ؟

فى ناس كتير هاتقول امى وناس هاتقول ابى وناس تقول شريكة حياتى وما الى ذلك

انا حبيبى شخص تانى خالص !!!!!!!!

عمرى ما رأيته ولكن اسمع واقرا وايقن انه اجمل البشر

عمرى ما كلمته ولكن اسمع واقرا وايقن انه اصدق البشر

عمرى حتى ما استمعت او رايت احد من اصحابه ولكن اعلم يقينا انهم كالنجوم

اتمنى من كل قلبى امنية صادقة انى اروح ازوره واقف قدامه اكلمه

اتمنى من كل قلبى ان انا اكون رفيقه

عارفين هو مين ؟

هو الصادق الامين - ولنا الفخر

هو من كفاه الله المستهزئين - ولنا الفخر

هو سيد ولد ادم - ولنا الفخر

هو على صراط مستقيم - ولنا الفخر

هو اول من تنشق عنه الارض فيكسى حلة من حلل الجنة - ولنا الفخر

هو اول الناس خروجا من القبر اذا بعثوا - ولنا الفخر

وهو خطيبهم إذا وفدوا‏ - ولنا الفخر

وهو مبشرهم إذا ‏ ‏أيسوا - ولنا الفخر

هو يقوم عن يمين العرش ليس أحد من الخلائق يقوم ذلك المقام غيره - ولنا الفخر‏

هو اول شافع واول مشفع يوم القيامة - ولنا الفخر

هو لواء الحمد بيده يوم القيامة - ولنا الفخر

هو أكرم ولد ‏ ‏آدم ‏ ‏على ربي - ولنا الفخر

هو حبيب الله - ولنا الفخر

هو النبى لا كذب هو ابن عبد المطلب - ولنا الفخر

اللهم انى احبك واحب رسولك صلى الله عليه وسلم حبا خالصا من قلبى فاسقنى من يده شربة هنيئة لا نظمأ بعدها ابدا

اللهم انى احبك واحب رسولك صلى الله عليه وسلم حبا خالصا من قلبى فاجمعنى به فى الفردوس الاعلى يا كريم

شعورك ايه ؟

لنفترض اننا فى يوم من الايام عملنا عمل خير واكتشفنا بعد كدة اننا اخطأنا التقدير فى هذا الامر ما هو احساسك وقتها نضرب مثل للموضوع ده لو حضرتك فى طريقك حد قابلك واشتكى لك من فقدان ماله وانه على سفر ولم يكن يبدو عليه اى ملامح للكذب او الخداع فقمت بمساعدته ثم اكتشفت بعد وقت انه نصاب !!!!!!!! ما هو احساسك وقتها هل تشعر بالندم على انك ساعدت احد لايستحق ؟ هل تشعر انك مغفل حيث لم تدرك انه كاذب ؟ ما هى النية التى سوف تنوى اياها؟ هل تنوى عدم مساعدة احد مرة اخرى؟ هل تنوى عدم اخراج صدقة لاحد لانه لم يعد احد يعلم من الصادق من الكاذب ؟ انا لا اقصد هنا الصدقات على وجه الخصوص ولكن اقصد هنا عمل الخير عموما الذى اكتشفت انه لم يكن فى محله ماذا سيكون تصرفك ونيتك وقتها ؟

لا لتصدير الغاز لاسرائيل

تعالوا معنا لحضور المحاكمة في مجلس الدولة يوم 24 يونيو

السادة الأصدقاء الكرام تحية طيبة و بعد

أتشرف بإحاطتكم بأنه قد تحدد يوم 24 يونيو 2008 للنظر في الشق المستعجل في الدعوى 33418س62 أمام محكمة

القضاء الإداري بمجلس الدولة للحكم بوقف ثم إلغاء قرار وزير البترول الذي تستند عليه عملية تصدير الغاز لإسرائيل

إلى جلسة 24 يونيو 2008 قاعة 11 رول 75 .

و الأمل أن يتسع المجال للتنويه بذلك بين أصدقائكم و في أوساطكم حتي تحظى الدعوى بحضور مكثف في ذلك اليوم

بمحكمة القضاء الإداري بشارع الجيزة أو أن يتم إرسال توكيلات موثقة بالشهر العقاري باسمي ،ص.ب.665 المعادي

، تليفون 0225212155. و ندعو الله أن تلقي دعوانا قبولا من قضائنا الشامخ.

الســـــفير

إبراهيم يســري

المحامي بالنقض

دى دعوة قريتها على مدونة خلى ضافيرك ضليلة

http://khly-dafyrk.blogspot.com/

وبما انى معارض لموضوع تصدير الغاز لاسرائيل يبقى اشارك ولو بنشر الرسالة دى

فى ايه يا دكاترة

امبارح اخذت شعبى ( مراتى وبنتى ) وقولت اروح بيهم للدكتور علشان مراتى عندها شوية وجع وبما انى رجعى ومش تقدمى قولت شعبى ما ينكشفش على رجالة ابداً

قعدت افكر على دكتورة نروح لها لغاية ما افتكرت دكتورة عندها عيادتين ويفط وهايلمانات كدة وتحس انك قدام دكتورة متمكنة من مجالها وعيادتين منهم واحدة فى منطقة راقية وكدة

المهم اتصلت بالدليل طلبت نمر الدكتورة لقيتها موجودة

اخدتهم من الدليل روحت متصل بالعيادة الخاصة اسال الدكتورة موجودة لقيت الممرضة بتقولى موجودة احجزلك

قولت لها احجزى مش عيب ولا حرام بس قولى لى الاول الكشف بكام قالت لى 11 جنيه ( جر رجل )

اتصلت بشعبى قولت لهم اجهزوا هاعدى عليكم ونروح للدكتورة المبجلة ذات العيادتين

روحنا العيادة

دخلنا العيادة

دفعت ال 11 جنيه بحالهم

وقاعدين لغاية اللى عند الدكتورة يطلع لقينا سؤال غريب من الممرضة

هو انتم ساكنين فين ؟!!!!!

بس حضرتك ما اتصلتش من المنطقة ؟!!!!!!

واسئلة تنم عن الاستفسار عن الحالة المادية والمعنوية بس بطريقة غير مباشرة

ودخلنا للدكتورة ولاننا لم نكن متابعين معاها عملت لنا البحر طحينة

طلعت برة استنيت شوية ( حوالى خمس دقائق بالتمام والكمال )

وبعد ما استنيت ده كله لقيت الممرضة طالعة تقولى المودام خلصت العملية والحساب 116 جنيه مصرى من اللى بيجي بطلوع الروح وبيروح بمنتهى البساطة

قولت لها ليه ؟!!

وبعدين قبل ما تعملوا العملية مش تسالونى يمكن مفيش معايا فلوس تكفى !!!!

قالت لى طيب شوف الدكتورة هاتقول لك ايه !!!!!

دخلت لمراتى سالتها قالت لى الدكتورة سالتنى جوزك اللى هو انا بيشتغل ايه !!!!!

قولت سالوكى قبل ما يعملوا العملية قالت

الدكتورة سالتنى قالت لى جوزك هايتكلم على العملية ولا ايه !!!!!!

المهم دخلت الدكتورة المبجلة ذات العيادتين

قوم ايه كشرت وقالت الدكتورة اللى كنتم معاها دى منها لله اللى عملته ده جريمة وكان لازم تعمل وكان لازم تسوى وهاتك يا ذم وتقليل من قدرها

صبرت وقولت لغاية ما تكتب الدوا

كتبت الدوا وقالت الدوا الاولانى مضاد حيوى غالى شوية معلش

والتانى مستورد هاتوه من صيدلية خليل او العزبى هايطلع علشان برة هاتلاقوه غالى

وهاتك يا كتابة ولازم المودام تروح لها كل يومين تتابع معاها ( والله العظيم كل يومين )

قولت لمراتى بصوت مسموع امسكى البنت واطلعى برة علشان هاتعارك مع الدكتورة ( تكتيك )

ردت الدكتورة ليه بس خلى علينا خالص

قولت لها اعملى معانا واجب

ومن هنا لهنا والشويتين دول

قالت لى خلاص ادفع 90 جنيه بس

قولتلها والمتابعة ايه نظامها

قالت لى مش فارقة

قولت لها علشان ابقى عارف واعمل حسابى

قالت لى اصل احنا هانعمل ونسوى وعاوزة تشرح

قولت لها الفلوس كام

قالت خلاص 10 جنيه بس

انا راضى ذمتكم ينفع كدة

ينفع اسلوب التجار والمعلمين فى الطب كمان

وبما انى مش طبيب مش عارف كلامها صح ولا غلط

بس اعمل ايه مضطر اثق فيها وفى كلامها وذلك

بس الاسلوب ده مش اسلوب ممكن الواحد يثق فيه ابدا