اعتذار غير مقبول

هى وصلت لدرجة اهانة المصحف الشريف

معجزتنا الخالدة

وصلت للدرجة دى

مرة يسبوا نبينا عليه الصلاة والسلام

ومرة تانية يهينوا المصحف

المصحف الشريف كتاب الله المعجز والموضوع يعدى كدة باعتذار كلب امريكا لعميل عراقى

هو ده مقامه عندنا

هى دى قيمة ديننا عندنا

والله لو هو كدة يبقى احنا ما نستاهلش نعيش علي الارض تانى

المصحف الشريف اللى العلم لسة واقف قدام اياته عاجز عن انه يجاريه

المصحف اللى العلم لسة بيكتشف حاجات وحقائق هو اشار اليها من 1400 سنة

واخرتها ان واحد الحمار احسن منه زى ما الاية 55 من سورة الانفال ما بتقول يعتذر لنا عن كدة

وقبله واحد اقل منه يضرب عليه نار

عارفين الاية بتقول ايه

إن شرّ الدواب عند الله الذين كفروا فهم لا يؤمنون

يعنى بوش والله العظيم عن يقين عمره ما هايحصل مقام الحمار - الا لو اعلن اسلامه - شر الدواب

يطلع مين بوش علشان حد من جنوده يهين المصحف الشريف

ويطلع مين المالكى علشان بوش يعتذر له

اللهم يا من قلت فى كتابك العظيم الذى لا يأتيه الباطل من بين يديه ولا من خلفه

انا نحن نزلنا الذكر وانا له لحافظون

اللهم يا من قلت فى كتابك المعجز

انا كفيناك المستهزئين

اللهم انا نؤمن بكتابك ونرضى بقضائك ونعلم يقينا ان وعدك ات لا محالة

اللهم يا من لا رب لنا سواه ولا اله لنا غيره

اللهم يا حافظ يا منتقم هذا كتابك يُهان وهذا نبيك يُسب ولا ملجأ لنا الا انت

اللهم ارنا فيمن اهان كتابك وسب نبيك عجائب قدرتك واجعل من ذلك اية تهدى بها القلوب يا رب العالمين

مفيش رحمة

مع ان الدين بتاعنا دين الرحمة

ومع ان رسولنا صلى الله عليه وسلم رسول الرحمة الا ان الناس كلها فى مصر وبرة مصر بتتعامل مع بعض بدون رحمة كله بيطحن فى كله كله بيستغل كله ابتداءاً من العربجية لغاية الدكاترة لو ركبت كارتة تلاقيها زادت تسال ليه يقولك هى جت عليا ما كل حاجة غلت لو ركبت مشروع تلاقى الاجرة زادت اضعاف زيادة السولار ويقولك الحكومة لو اشتريت حاجة البياع يحاول يسرقك لو انت مش صاحي له وابسط مثل لكدة اصحاب البنزينات اللى باعوا البنزين 80 على انه 90 و 92 و 95 الدكاترة حدث ولا حرج المشكلة الكبيرة الحكومة اللى خلت الشعب كله يبيع الحديدة اللى كان قاعد عليها تتطلع برة مصر تلاقى حماس وفتح - مسلمين وموحدين بالله - ونازلين قتل وخطف فى بعض لبنان المعارضة والموالاة ومشاكل كتير الواحد مش فاهم منها حاجة العراق تلاقى جماعات تقتل جماعات وسايبين العدو ينهب البلد كل البلاوى دى طالعة من المسلمين مع ان الدين بتاعنا اساساً دين الرحمة لو كلنا حاولنا نتعامل مع بعض بالرحمة ربنا هيرحمنا " ما يفتح الله للناس من رحمة فلا ممسك لها وما يمسك فلا مرسل له من بعده وهو العزيز الحكيم " صدق الله العظيم الرحمة لو مش موجودة معانا من اعداءنا فده يبقى شئ عادى لانهم مش من ديننا ومش عندهم التعاليم اللى تخليهم يتعاملوا بالرحمة مع حد المشكلة الكبيرة لو كانت من المسلمين ومع المسلمين من لا يرحم لا يٌرحم

احساس جميل

احساس جميل جدا احساس ان الواحد يكون أب

حاجة جديدة جداً عليا وفرحان بيها جداً مع انى فى شغلى بخاف اتكلم فى الموضوع ده مراعاة لاحاسيس زمايلى اللى منهم متجوزين من فترة ولسة ربنا لم يرد لهم الانجاب

حاجة جميلة انك تكون قاعد جنب المولود تتفرج عليه وهو بيتمطع او بتمسك ايده الصغيرة جداً او تتفرج عليه وهو نايم زى الملايكة

شيء جميل جدا واحساس رائع

بس الموضوع ده بيخليك تفكر فى حاجات كتير جدا

اولها انك عاوز المولود يتربى كويس اخلاقياً

وتقعد تفكر كتير وتحس انك داخل بيه البحر وتبقى محتار اخلى المولود يطلع منحرف علشان يعرف يتعامل مع البشر ويعرف ياخد حقه كويس ( اكيد طبعاً مش هاسيبه يبقى كدة ) ولا اربيه على انه يكون مؤدب واخلاق وكل الناس تستكرده وتعتبره من الاكراد اللى هما بتوع العراق دول

تقعد تفكر فى حاجات تانية زى انك عليك مسئولية جامدة ( مش مادية لان الارزاق على الله ) ولكن مسئولية ادبية نحو تعليم المولود الجديد فى دولة الطلبة فيها بتجيب الدرجات النهائية ( هادور على مدرسين خصوصيين من دلوقت )

تقعد تفكر فى حاجات كتير من هذا القبيل

احساسات كتيرة جميلة كلها ماكنتش متصور انى خلال سنة هتختلف حياتى واهتماماتى بالشكل الكبير ده

بس على فكرة انا فعلاً مش شايل هم خالص لانى متوكل على الله فى الموضوع ده وعارف ومتأكد ان الله عند حسن ظنى به

ومن يتوكل على الله فهو حسبه

فان تولوا فقل حسبى الله لا اله الا هو عليه توكلت وهو رب العرش العظيم

مرحلة الجوع والفزع

• فوجئت تانى يوم لقرارات زيادة اسعار الوقود دخل علينا المكتب واحد محترم واحنا قاعدين فى امان الله وبصوت عالى كدة قعد يقول كلام من الكبير المجعلص اوى وكان اخر كلامه :

على فكرة احنا داخلين على مرحلة جوع وفزع

قوم ايه كلنا انتبهنا واشرئبت الاعناق واحنا مش فاهمين حاجة غير انا احنا كنا ساعتها جعانين وبصينا الى صاحب الصوت العالى وسألنا ليه ؟

كان رده ان الفقير داخل على مرحلة اشد فقراً والغنى لو عنده فلوس فى مصر هيحولها برة مصر علشان يحافظ عليها من القرارات المفاجئة والغير مأمونة العواقب بالنسبة له

• ومن يومين اخويا بعد ما اخد اعفاء من الجيش وبدون ادنى تفكير وبتلقائية جه سألنى ما تعرفش حد يسفرنى الامارات قولت له هاسألك

حد يعرف حد يسفرنى انا واخويا الامارات ومستعدين نشتغل اى حاجة حتى ولو سواقين

( على فكرة انا محاسب واخويا محامى )

العيش والعيشة واللى عايشينها

النهاردة وانا بتابع احوال الرعية لقيت انهم بيشتكوا من الارهاق الشديد نظرا لان الشعب له من الخصائص ما يجعله يطبق مقولة اللى يجى تحت ضرسى

ولان احوال شعبى والحمد لله جيدة جدا مقارنة بالشعوب الاخرى اللى غلوا فيها الغاز والجاز ومفيش فيها عيش والعملية عندهم متأزمة اوى

لذا فقد وجب علينا انا وشعبى العظيم المجاهد قول

الحمد لله الذى لا يحمد على مكروه سواه